مشكلة تغيير لون كريم الأساس الى رمادي.

السلام عليكم..

بعد أنقطاع طويل عن المدونه رجعت لكم بموضوع مسبب مشكله كبيره عند الأكثريه أن شاء الله تستفيدون منه ..

شريت كريم أساس  واذا وضعته على الوجه يتغير لونه الى رمادي او باهت مافيه نضاره !! والحل؟!! 

أولاً لازم نعرف السبب تغيّر لون الكريم الاساس . 

السبب طبعاً بدون تفكير هو اختيارك لون (الأندرتون ) الغلط لطبيعة بشرتك لاحظوا ماقلت درجة اللون لا قلت ( الاندرتون ). 
سبب أخر هو غلط أو جهل البائعين في المحل بالمعلومات الكافيه واللازمه عن المنتج لمساعدتك يعني مثلاً انتِ طلبتي كريم أساس أندرتونه دافي يعني على أصفر أو بيج لكنهم أعطوك بداله كريم اساس اندرتونه بارد يعني على وردي .!

طيب والحل لهالمشكله خصوصاً اذا كان كريم الأساس غالي؟!!.

الحلول فيه كم طريقه ان شاء الله راح تحل هالمشكله منها:

تخلطين مع كريم الاساس كركم الوجه (من العطار) كميه بسطيه جداً او تخلطين الكركم مع ماء وتجيبين قطنه وتغمسينها في الخليط هذا وتمررين على وجهك منه .

وفيه حل أخر تأخذين شدو أصفر بشرط مايكون فيه شيمر أو جليتر يعني مات وتفتتين منه جزء بسيطه وتخلطينه مع كريم الاساس .

                             







وحل أخر بعد بعد ماتخلصين من وضع كريم الأساس على وجهك تحطين عليه بودرة صفراء  مثل البنانا أو إيلف او ماركات ثانيه متوفر عندها بودره صفراء مش شرط تكون لوس باودر ينفع تحطينه مضغوطه  وراح تلاحظينه صار فيه نضاره  ولون مناسبك .

وحل أخر هو أكوا كريم من ميك اب فوإيفر هو عباره عن شدو كريمي أصفر تحطين منه مسحه خفيفه على الوجه قبل كريم الاساس .

فيه بعد حل وهذا أنا شخصياً معتمده وهو أنك تجيبين كريم أساس لونه برونزي يعني يميل عالبرتقالي وتخلطينه مع كريم الأساس راح تشوفين لونه تغير أنا أستخدم كريم اساس برونزي جاني هديه مع مشترياتي من قزاز ماأعرف سعره كم بالضبط . ( ماحطيت فلتر عالصوره عشان يوضح لكم الدرجه ).

وأستخدم بعد كريم الاساس المعروف جداً الديرماكول هو مايستخدم اصلاّ لوحده هو تغطيته فل كفر ثقيل جداّ لازم تخلطينه مع سائل  كريم اساس سعره معروف ٥٠ ريال .

طبعاً عشان تعرفين الأصلي من التقليد الأصلي يكون ملمس العلبه خشن مش أملس . 

الرقم الي استخدمه هو أغمق لون رقم 224 شوفوا لونه كيف صاير برتقالي . 
(صورة الدرجه من النت).

هنا تطبيق من النت أن شاء الله يكون واضح لكم :
الصوره الأولى : كريم أساس لونه باهت يميل عالرمادي.
الصوره الثانيه : حطة من ديرماكول عليه .
الصوره الثالثه : النتيجه لون حلو فيه نضاره ومناسب لها وفل كفر.

طريقه ثانيه بعد أعتمد عليها هي تحطين على كامل وجهك برونز موس مثل برونز شانيل المشهور بديله برونز من بورجواز.

بعدها أحط كريم الاساس مأقدر أوصف لكم جمال اللون الي يطلع فظييييع روعه .
                                               :
                                               :
وبس هذا كل موضوعنا اليوم أن شاء الله أستفدتوا أكتبوا لي تعلياقتكم وأسئلتكم .